Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 20.24 | Dem. 20.27 (English) | >>Dem. 20.30 |
20.26φέρε δὴ καὶ τὰς εὐπορίας , ἃς ἀναπαυομένους τινὰς εὐπορήσειν οὗτοι φήσουσιν , εἰς δέον ὑμῖν γιγνομένας δείξω . ἴστε γὰρ δήπου τοῦθʼ ὅτι τῶν τριηραρχιῶν οὐδείς ἐστʼ ἀτελὴς οὐδὲ τῶν εἰσφορῶν τῶν εἰς τὸν πόλεμον . οὔκουν ὁ πολλὰ κεκτημένος , οὗτος , ὅστις ἂν ᾖ , πόλλʼ εἰς ταῦτα συντελεῖ ; πᾶσʼ ἀνάγκη . καὶ μὴν ὅτι δεῖ τὴν εὐπορίαν εἰς ταῦθʼ ὑπάρχειν πλείστην τῇ πόλει , πάντες ἂν ὁμολογήσειαν · παρὰ μὲν γὰρ τὰς ἐπὶ τῶν χορηγιῶν δαπάνας ἡμέρας μέρος μικρὸν ἡ χάρις τοῖς θεωμένοις ἡμῶν , παρὰ δὲ τὰς τῶν εἰς τὸν πόλεμον παρασκευῶν ἀφθονίας πάντα τὸν χρόνον ἡ σωτηρία πάσῃ τῇ πόλει .
20.27ὥσθʼ ὅσον ἐνθάδʼ ἀφίετε , ἐκεῖ κομίζεσθε , καὶ δίδοτʼ ἐν τιμῆς μέρει ταῦθʼ ἃ καὶ μὴ λαβοῦσιν ἔστιν ἔχειν τοῖς τοῦ τριηραρχεῖν ἄξια κεκτημένοις . ἀλλὰ μὴν ὅτι τῶν τριηραρχιῶν οὐδείς ἐστʼ ἀτελής , οἶμαι μὲν ὑμᾶς εἰδέναι πάντας , ὅμως δὲ καὶ τὸν νόμον ὑμῖν αὐτὸν ἀναγνώσεται . λαβὲ τὸν περὶ τῶν τριηραρχιῶν νόμον καὶ λέγε τοῦτʼ αὐτό .ὁρᾶθʼ ὡς σαφῶς , ὦ ἄνδρες Ἀθηναῖοι , μηδένʼ εἶναι τριηραρχίας ἀτελῆ διείρηκεν ὁ νόμος πλὴν τῶν ἐννέʼ ἀρχόντων . οὐκοῦν οἱ μὲν ἐλάττω κεκτημένοι τοῦ τριηραρχίας ἄξιʼ ἔχειν ἐν ταῖς εἰσφοραῖς συντελοῦσιν εἰς τὸν πόλεμον , οἱ δʼ ἐφικνούμενοι τοῦ τριηραρχεῖν εἰς ἀμφότερʼ ὑμῖν ὑπάρξουσι χρήσιμοι , καὶ τριηραρχεῖν καὶ εἰσφέρειν . τίνʼ οὖν ῥᾳστώνην τοῖς πολλοῖς ὁ σός , ὦ Λεπτίνη , ποιεῖ νόμος , εἰ μιᾶς ἢ δυοῖν φυλαῖν ἕνα χορηγὸν καθίστησιν , ὃς ἀνθʼ ἑνὸς ἄλλου τοῦθʼ ἅπαξ ποιήσας ἀπηλλάξεται ; ἐγὼ μὲν οὐχ ὁρῶ . τῆς δέ γʼ αἰσχύνης ὅλην ἀναπίμπλησι τὴν πόλιν καὶ τῆς ἀπιστίας . οὔκουν ὅτε πολλῷ μείζονα βλάψει τῶν ὠφελειῶν ὧν ἔχει , προσήκει λελύσθαι παρὰ τοῖσδʼ αὐτόν ; ἔγωγʼ ἂν φαίην .
Νόμος
ἀτελῆ δὲ μηδένα εἶναι τριηραρχίας πλὴν τῶν ἐννέα ἀρχόντων .
20.28
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 20.24 | Dem. 20.27 (English) | >>Dem. 20.30 |